Con motivo do Día Europeo das Linguas, desenvolvemos unha serie de actividades co obxectivo de informar e sensibilizar o alumnado sobre a importancia desta data e sobre o valor da diversidade lingüística e cultural.
luns, 28 de setembro de 2026
sábado, 23 de maio de 2026
ACTIVIDADE DINAMIZACIÓN LECTORA INTERCENTROS
LECTURAS COMPARTIDAS LAXEIRO/VALEIXE
Co gallo do Día do Libro 2026, o pasado 23 de abril, os Equipos de Dinamización do Laxeiro e do CEIP de Valeixe, na Cañiza, compartimos unha actividade intercentros de intercambio de lecturas titulada “Invitacións lectoras”, da que xa demos conta nunha entrada anterior deste blog.
A actividade consistiu en que o alumnado de 3º curso de Educación Primaria agasallase os nenos e nenas de Valeixe cun exemplar procedente do expurgo da Biblio Laxeiro. Estes títulos retíranse da biblioteca para dar cabida a novas incorporacións e manter o fondo actualizado, e non pola súa falta de calidade literaria.
Así foi como, con moita ilusión, fixemos chegar cincuenta e tres libros, cada un deles acompañado dun marcapáxinas personalizado no que o alumnado escribiu os motivos polos que recomendaba a súa lectura.
Os nenos e nenas de Valeixe quedaron sorprendidos e encantados ao recibir a caixa de libros xunto cos saúdos do alumnado e profesorado implicado do Laxeiro; tan sorprendidos e agradecidos como quedamos nós ao recibir a súa resposta.
Achegáron ao colexio. unha orixinal e creativa caixa de agasallo cunha manualidade confeccionada a partir dun libro de expurgo, pulseiras feitas á man coa frase motivadora “Eu leo” e un fermoso cadro pintado polo alumnado, que inclúe un código QR coa ligazón a un conto creado por eles e rubricado ao modo de Laxeiro.
xoves, 14 de maio de 2026
SEMANA DAS LETRAS GALEGAS 2026 NO LAXEIRO
DÍA DAS LETRAS GALEGAS 2026
Esta semana conmemoramos a chegada do Día das Letras Galegas, o 17 de maio, dedicado este ano á polifacética escritora viguesa Begoña Caamaño.
O pasado 12 de marzo, aproveitando a visita da súa irmá ao centro para gravar un podcast, realizamos un acto de homenaxe á autora. Ademais, ao longo desta semana estamos a desenvolver distintas actividades nas aulas para coñecer e recoñecer a súa figura e a súa achega á cultura galega.
Os nenos e nenas de 6ºB realizaron traballos sobre as distintas facetas da autora que serviron para confeccionar un mural conmemorativo colocado á entrada do centro para darlle visibilidade a esta data.
Ademais, o alumnado de 5ºB preparou unha pequena representación de teatro lido na que se realiza un percorrido pola vida da escritora. Este grupo visitou as aulas de Primaria coa dramatización titulada Roteiro sobre Begoña Caamaño.
Na Bibliolaxeiro está a disposición dos usuarios unha exposición de libros adicados ás Letras Galegas 2026. Deste xeito pódense consultar, ler e gozar de libros en galego.
Aproveitamos este recuncho para anunciar que o podcast adicado a Begoña Caamaño foi galardoado co 1º Premio do VIII Concurso de Podscast na Radio na Biblio.PARABÉNS a todos os participantes!!! Para escoitalo premer na ligazón:
https://drive.google.com/file/d/17aXiMcDMUqw4_95pFiY-YYI2o4auWcyE/view?usp=drivesdk
Nas aulas, aproveitando a temática da obra Circe ou o pracer do azul de Begoña Caamaño, os nenos e nenas traballaron A Odisea adaptada ás súas idades. Analizaron o personaxe de Penélope en contraposición ao protagonista Ulises. Deste xeito, descubriron na súa figura valores como a paciencia, a intelixencia, a lealdade e a capacidade de resistencia, reflexionando tamén sobre o papel das mulleres nos relatos clásicos e a importancia de mirar estas historias desde unha perspectiva crítica e igualitaria. Ademais do idioma galego, tamén escoitaron e leron a versión en inglés.
martes, 28 de abril de 2026
DÍA DO LIBRO 2026
DÍA DO LIBRO NO LAXEIRO
Con motivo do Día do Libro, o alumnado de 3º de Educación Primaria do CEIP Laxeiro participou na actividade “Invitación á lectura”. Esta proposta consistiu en que cada neno e nena escollese un libro do expurgo da Bibliolaxeiro, o lese e, posteriormente, elaborase un pequeno resumo do seu argumento. Ademais, confeccionaron un marcapáxinas no que incluíron diferentes razóns para animar a outras persoas a descubrir e ler ese mesmo título.
Os marcapáxinas resultaron moi creativos.
Os nenos e as nenas esforzáronse en colocar todos os libros lidos nunha caixa de cores para enviar os libros a outro colexio público e deste xeito compartir experiencias lectoras. O colexio que comparte as lecturas co noso alumnado é o Ceip de Valeixe, un pequeno centro público ubicado en A Caniza, interesado en que o seu alumnado sexa usuario habitual das Bibliotecas, do mesmo xeito que no noso.
Aproveitaron tamén para lembrar os seus títulos favoritos e con eles decoraron un mural de aula no que reza a motivadora frase:
SE NON LES NON PASA NADA, SE LES PASA MOITO!!!
mércores, 25 de marzo de 2026
domingo, 15 de marzo de 2026
domingo, 1 de marzo de 2026
ROSALÍA DE CASTRO 2026
DÍA DE ROSALÍA 2026 NO LAXEIRO
A semana do 23 de febreiro adícase no Laxeiro a resaltar a figura da insigne poeta Rosalía de Castro. O mural que preside a entrada do colexio está adicado á estrela Rosalía. Neste curso, onde a ciencia é a protagonista dos contidos, Rosalía foi vista como a estrela HD149143b que foi nomeada Rosalía de Castro no 2019.
Ademais o alumnado elaborou traballos adicados á escritora e foron colocados á porta das aulas e nos corredores. Pola súa banda o alumnado de 6º A de ED Primaria traballou a proposta da AELG.
( Asociación de Escritores en Lingua Galega)
"Máis eles tamén perdidos"
Nesta montaxe pódense apreciar algúns dos traballos realizados:
luns, 16 de febreiro de 2026
ENTROIDO 2026
PERSONAXES DO ENTROIDO
Esta festividade serviu de ocasión perfecta para achegar aos máis cativos as personaxes emblemáticas do Entroido en Galicia. A iniciativa foi levada a cabo por un grupo de alumnos e alumnas de 5º de Educación Primaria, que asumiron a tarefa con grande entusiasmo.
O soporte escollido para a presentación foi o pequeno teatro Kamishibai, un formato dinámico e moi atractivo para o os escolares máis novos. Para a elaboración das imaxes tomouse como referencia o libro É tempo de Entroido, de Ramón D. Veiga, con ilustracións de David Sierra.
O resultado foi fantástico e o esforzo do alumnado quedou reflectido nunha montaxe que permite apreciar todo o traballo realizado.
venres, 30 de xaneiro de 2026
DÍA ESCOLAR DA NON VIOLENCIA E A PAZ
DÍA DA PAZ 2026
Hoxe, 30 de xaneiro, celébrase en todos os centros de ensino o Día Escolar da non Violencia e a Paz. Esta data coincide co aniversario do asasinato no 1948 dun home sinxelo, convertido en heroe pola memoria popular, activista político e defensor da non violencia e a paz como camiño.
A PAZ está intimamente vinculada ao respecto, á igualdade, á coeducación, á xustiza, á felicidade, á tolerancia e á cooperación. Todos estes valores foron traballados nas aulas do Laxeiro dun xeito específico ao longo desta semana, sen esquecer que constitúen o motor que impulsa a educación e a formación do noso alumnado. Con este propósito deseñouse e levouse á práctica unha serie de actividades, con alusións á ciencia —tema do Proxecto Anual 2026—.
ELEMENTOS PARA A PAZ. Co obxectivo de espertar o interese pola química a través do xogo coas palabras, traballáronse os símbolos químicos buscando termos relacionados cos valores da paz e da convivencia. Así, por exemplo, o H de hidróxeno transformouse na palabra humanidade, tan necesaria nos nosos días. Con todos estes elementos convertidos en fermosas palabras, elaborouse unha Táboa Periódica para a Paz. Esta actividade foi realizada polo alumnado de 3º e 4º de Educación Primaria.
LABORATORIO DE PAZ. Dirixida ao alumnado de Educación Infantil, 4º e 6º de Educación Primaria. Cada aula inventou un aparello, máquina, fórmula ou vacina para acadar a Paz, como por exemplo unha máquina para dar abrazos ou un “cortaodios”. O alumnado debuxou os seus inventos e, con todos eles, confeccionouse un vistoso mural.
A ÁRBORE DA PAZ. Pensada para fomentar no alumnado o amor pola natureza como medio para promover a paz, o respecto e a convivencia harmoniosa cos demais, a actividade permitiu que os nenos e nenas do 1º ciclo de Educación Primaria investigasen sobre a Premio Nobel da Paz Wangari Maathai. A súa visión de unir a ecoloxía e o desenvolvemento sostible coa democracia constitúe un legado imprescindible para a humanidade. A partir desta inspiración, o alumnado imaxinou o mundo como unha árbore chea de bos desexos.
O BAILE DA PAZ. No recreo soará "O baile da Paz" de Mamá Cabra e teremos a oportunidade de bailar pola PAZ.
XOGOS POLA PAZ . Na clases de Ed Física e Psicomotricidade , durante toda esta semana, preparáronse xogos colaborativos: cadea unida de aros, paracaídas "todos a unha"...
DENDE A COMUNIDADE EDUCATIVA DO CEIP PL. PINTOR LAXEIRO, BO DÍA DA PAZ!!!
 |
xoves, 4 de decembro de 2025
MES DA CIENCIA EN GALEGO: NOVEMBRO
Este curso, a ciencia —en toda a súa amplitude— está presente nas actividades complementarias a través do Proxecto Documental Integrado “Ecolaxeiro, superfáns da ciencia”. O punto de partida foi o Día das Bibliotecas, para o que se elaboraron traballos biográficos sobre científicas e científicos destacados empregando os fondos bibliográficos da Biblioteca. O formato escollido para desenvolver estes traballos foi o lapbook. Cada curso seleccionou unha figura científica para o seu estudo.
Como non podía ser menos, desde o Equipo de Dinamización Lingüística propoñemos a figura do protagonista do Día da Ciencia en Galicia 2025: Fernando Calvet y Prats. O alumnado de 3ºA foi o encargado de realizar o traballo sobre este eminente bioquímico, que sentou as bases da industria farmacéutica en Galicia a mediados do século XX.
EXPOSICIÓN DE EXPERIMENTOS NA BIBLIOTECA
Organizouse unha mesa de experimentos na Biblioteca para que o alumnado poida poñer en práctica conceptos como a electricidade estática, o electromagnetismo, a densidade e o comportamento dos líquidos, a tensión superficial ou a refracción da luz.
O alumnado de 5º elaborou carteis para ilustrar a exposición. En grupos de oito, todo o alumnado participa desta actividade. Despois da experiencia realizan unha ficha onde redactan o que máis lles gustou.
xoves, 30 de outubro de 2025
SAMAÍN 2025
A SANTA COMPAÑA NO LAXEIRO
Este curso o Equipo de Dinamización Linguística, en colaboración coa Biblioteca, organizou unha serie de actividades orientadas a seguir coas tradicións de orixe galega. Estudaron nas aulas a lenda da Santa Compaña e elaboraron traballos literarios e plásticos para decorar o centro.
sábado, 27 de setembro de 2025
DÍA EUROPEO DAS LINGUAS
DÍA EUROPEO DAS LINGUAS 2025 NO LAXEIRO
Como cada curso, no Laxeiro, aproveitamos o Día Europeo das Linguas para transmitir ao alumnado a importancia da aprendizaxe de diferentes idiomas. Resaltamos, tamén ,a ventaxe de ser bilingües para facilitar esta aprendizaxe, xa que, se crean habilidades cognitivas e lingüísticas que facilitan o proceso.
Sumámonos á iniciativa do Centro Europeo de Linguas Modernas do Consello de Europa traballando arredor do lema "Os idiomas abren corazóns e mentes!". Entre todas as aulas elaborouse un cartel conmemorativo en forma de quebracabezas: en cada peza aparece unha palabra relacionada co corazón e coa mente en dous idiomas, un deles, por suposto, o galego.
Ademais, na Radio Laxeiro soou un podcast elaborado por alumnado de 5º de Primaria. A través del pódese apreciar o entusiasmo do alumnado pola aprendizaxe doutros idiomas.
https://www.youtube.com/watch?v=eDJoRuXbL_U
.jpg)
xoves, 12 de xuño de 2025
ISAAC DÍAZ PARDO NO LAXEIRO
ISAAC DÍAZ PARDO HOMENAXEADO NO 2025 POLAS ARTES GALEGAS
Como cada ano, nenos e nenas do Laxeiro fixeron unha fermosa lembraza ao artista galego homenxeado o Día das Artes Galegas.
Este 2025 adícase ao polifacético Isaac Díaz Pardo (1920-2012). Intelectual, pintor, ceramista, deseñador, editor, empresario...pero sobretodo un personaxe moi comprometido co idioma e coa cultura galega.
Os alumnos e alumnas descubriron ao verdadeiro impulsor da restauración da cerámica galega, Sargadelos e investigaron sobre a súa vida e obra.
luns, 12 de maio de 2025
LETRAS GALEGAS 2025
RECITAL DE CANTAREIRAS NO LAXEIRO!!!
As Cantareiras do Laxeiro actuaron o pasado
mércores, 14 de maio, acompañadas por un pequeno grupo de nais de alumnos e
exalumnos, así como polo seu profesor Diego, da Academia Traspés. De xeito que
lograron deleitar a toda a comunidade educativa con a súa música e cantigas.
SEMANA DAS LETRAS GALEGAS 2025 NO LAXEIRO
carteis que anuncian esta data.
>
Desde a semana pasada o alumnado do Laxeiro está preparando unha serie de actividades para festexar o 17 de maio, Día das Letras Galegas.
Dado que este ano está adicado ás cantareiras en xeral, e en paticular a Eva Castiñeira, Rosa e Adolfina Casás e ás Cantareiras de Mens; os nenos e nenas están a aprender nas aulas Cantigas Populares galegas. Cada aula decorou estrofas das devanditas cantigas para ambientar o centro. Con estes traballos elaborouse un fermoso mural.
Ademais fixeron debuxos para compoñer
carteis que anuncian esta data.
Carteis tan chamativos como este:
Un pequeno grupo de alumnos está a ensaiar con Fátima, mestra de Infantil e membro do EDLG, afeccionada á música popular; unha actuación para o vindeiro mércores. Estará acompañada por outra nai do centro, invitada para este cometido polo centro.
Na entrada do colexio estase a preparar unha exposición do traxe tradicional galego para que o alumnado o poda apreciar e aprender o nome de cada unha das súas pezas.
Para obter información sobre contidos a traballar co gallo das Letras Galegas 2025, premer nestas ligazóns.
Programa para o mércores, día 14.
venres, 14 de marzo de 2025
DÍA DA MULLER NO LAXEIRO
CONMEMORACIÓN DO 8 DE MARZO NO LAXEIRO
Como é costume no Laxeiro, todos os cursos adícase a semana do 8 de marzo a realizar actividades encamiñadas a fomentar a igualdade de xénero pensando nunha futura cidadanía con valores de participación, xusticia social e solidaridade.
Nas clases o alumnado despois de visionar o vídeo promovido pola Consellería de Política Social e Igualdade que leva por título, "Eu vou comigo", realizáronse debates e postas en común sobre o respecto, a autoestima e o dano emocional que conlevan os estereotipos sociais. Fixéronse, tamén, representacións plásticas destes temas e un mural conmemorativo.
Ademáis traballáronse os logros de mulleres galegas destacadas polo seu traballo, talento e aportación á sociedade. Esta actividade tivo por título "Mulleres que inspiran" e velaiquí unha pequena pincelada dalguhas delas, HAI MOITÍSIMAS MÁIS:
Rosalía de Castro continúa a ser un refernte para o noso alumnado e as súas familias; de feito no Entroido houbo algunha dedicatoria á insigne autora.
domingo, 23 de febreiro de 2025
ROSALÍA NO LAXEIRO
ROSALÍA E CASTELAO, A ESCENA!!
É un pracer disfrutar da intepretación do alumnado do Laxeiro nunha obriña adicada a Rosalía de Castro no seu día, titulada "Rosalía e Castelao, a escena!!!" Queredes velo? Paga a pena!
Con moito agarimo presentamos aos nosos neniños e neniñas do Laxeiro homenaxeando a Rosalía.
Todo o alumnado acudiu á Biblioteca do centro para ver a peciña teatral. Fixéronse tres pases para que todos os cursos puideran asistir; merecen un aplauso ben longo!👏👏
ENCONTROS CON ROSALÍA NA BIBLIOTECA DO CENTRO PARA INFANTIL
O venres, día 21 de febreiro, fíxose unha presentación da escritora para o alumnado de Ed. Infantil na Biblioteca do centro. Alumnos de cuarto de Primaria foron os encargados de falarlle aos máis pequenos sobre a escritora. Cando rematou a presentación, cada neno e nena levou unha pulseira conmemorativa e un poemiña para decorar.
martes, 18 de febreiro de 2025
DÍA DE ROSALÍA 2025
PREPARANDO O DÍA DE ROSALÍA NO LAXEIRO
Un grupo de nenos e nenas do Laxeiro están a preparar o seu particular homenaxe á insigne escritora Rosalía de Castro no seu próximo día, o domingo 23 de febreiro. Están a ensaiar unha pequena peza teatral que ten como protagonistas a Rosalía e Castelao, en defensa do idioma. Será representada na Biblioteca do Laxeiro e pasarán todos os cursos para gozar desta obra,
Os máis pequenos colaboraron na pintura de decorados:
Unha vez a obra sexa representada, subirémola ao blog.
Deixamos unhas ligazóns con unidades didácticas para traballar nas aulas;
mércores, 5 de febreiro de 2025
O TEATRO NO LAXEIRO
Este curso estase a traballar de xeito transversal o teatro no centro. Aprovéitanse distintas situacións educativas para achegar ao alumnado a este xénero literario como un xeito de
expresión oral e escrita. O teatro é unha ferramenta útil para mellorar a linguaxe, a
comprensión e, especialmente, a expresión nos nenos e nenas; tamén, é unha forma de ampliar o vocabulario, mellorar a pronunciación, a entoación e vocalización.
Un grupiño de alumnos e alumnas de 4º de Primaria levaron polas aulas unha pequena dramatización sobre a vida e obra de José Rodríguez, o matemático de Bermés.
A posta en escea foi seguida con moito interese polo alumnado de diferentes idades.
luns, 20 de xaneiro de 2025
CHARLA SOBRE A ANTIGA FÁBRICA DE CHOCOLATE DE TEIMENDE (OURENSE)
O pasado venres, día 17 de xaneiro, achegouse ao Laxeiro, Loli Casares, membro dunha familia que durante case un século adicouse á fabricación de diferentes tipos de chocolate coa denominación "Chocolate Caldelas" ou "Chocolates Casares". O motivo da súa visita foi impartir unha charla ao alumnado sobre a forma tradicional de elaboración deste doce.
Deste xeito, os nenos e nenas aprenderon os principais ingredientes que leva o chocolate, a procedencia do cacao, as caracterísiticas desta planta, o modo de chegar ás costas españolas dende lugares tan lonxanos coma Guinea Ecuatorial ou Brasil, como se transportaban dende o porto de Bilbao ata Ourense e de ahí a aldea de Teimende en camión. Un camión propiedade da familia Casares.
Unha vez obtidos os sacos de gran de cacao, tostábano e descascábano nunha máquina manual; mesturábano cos outros ingredientes (manteiga de cacao e azúcre) ata obter unha masa líquida. Posteriormente botaban a masa nos moldes e deixábana enfriar nunhas neveiras. Despois envolvían as tabletas en papel de aluminio e en papel etiquetado co logo da fábrica. Unha vez rematado o proceso, o pai levaba o produto fabricado ás tendas de alimentación.
Loli, mestra de profesión, xubilada, adica parte do seu tempo a ir polos centros que o desexen para explicar aos nenos e nenas como o seu avó e despois o seu pai fabricaba o "Chocolate Caldelas".
Todo a charla estivo amenizada con anédotas como cando contou que o seu pai lle mandaba pesar a masa para metela nos moldes, ou como iba traballar á fábrica no verán, nas súas vacacións. Tamén trouxo material para captar a atención do alumnado: rexistros de recepción da mercancía, letras de cambio de pagos de máquinaria para modernizar a fábrica, froito do cacao, grans de cacao para ulir, moldes, tabletas de chocolate. Para rematar, repartiu unha deliciosa onza de choccolate para todos e todas.
Na actualidade a fábrica de chocolate é un museo:
Para coñecer máis sobre o tema pódese mirar a seguinte ligazón:
Subscribirse a:
Publicacións (Atom)